3 Aralık 2014 Çarşamba

Loqum

1 kilogramm unğa 1 stakan süt, 1/2 stakan iritilgen qoyun yağı ya da iritilgen sarı yağ, 1 yımırta, 2 aş qaşığı şeker, 1− 2 çay qaşığı tuz, 30 gramm maya kâfidir.
1.      Çanaq içine sıcaq süt ya da suv qoyula. Onuñ içine iritilgen quyruq yağı, yımırta, şeker ve tuz qataraq qarıştırıla, maya da qoşqan soñ, beyaz undan hamır basıla.
2.      Hamırnıñ köterilgenini beklemeden, onu un sepilgen sofra ya da hamır tahtası üstüne alıp, un üzerinde yuvarlatıla. Uzun oqlav şeklinde tığırçıqlağan soñ, ondan ceviz büyükliginde tamalaçıqlar kesile.
3.   Loqumlarnıñ dülber körünişli olup çıqması içün her bir hamır parçasını isqara (reşotka) üstünde yuvarlatmaq tevsiye oluna. Soñra olarnı baş parmaqnen ya da avuç içinen yengilden basıp, hepsine tomalaq ve yalpaqça şekil berile.
4.      Qazan içine çoq mıqdarda yağ qoyıp, o yağ yahşı etip talatılğan soñ, loqumlarnıñ bir qaç danesini onuñ içine bıraqıp, yaldatıp, qızartıla. Altın kibi sap-sarı olğan soñ, süzgüçnen süzip alına ve biraz yağı sarqması beklenile.
5.      Sofrağa berecekte üzerine şeker tozu sepile.
İhtar: loqumni sofrağa çaynen beraber suvuq alında bermek tevsiye oluna. Üzerine şeker sepilgen olsa, onu sıcaq sorpanen de bermek mümkün.

Malümatnı Nilüfar Raisova 
Bilal Mambetnin "Qırımtatar Yemekleri" kitabından köçürip aldı.

Действия:

0 коммент.:

Yorum Gönder