2 Haziran 2015 Salı

Tenbelniñ tüşü (qısqa hikaye)

Adamnıñ yaşı keçken sayın onuñ hareketi sakinleşe, adımları ağırlaşa eken, - dep tüşüne Veis ve her kün saba turğanda beden terbiyesinen oğraşmağa niyetlene. Bu aqta atta tüş de köre.
…Ustünde mas-mavı triko. Ayaqlarında beyaz yolaqlı krossovkalar. Başında topuzlı fes, yanaqları kiraz kibi al. Çertseñ çatlaycaq. Çoqusı adamlar Daha yuqlay. O ise çapa. Sağlıq peşinden çapa.

Ufuqta mağrur dağlar körüne. Tañ avası ter-temiz. Nefes alğan sayın alacağı kele. Avtobus beklep turğan adamlar oña, onuñ iradesine suqlana. Aysa! Sağlam ekende çapmasañ, hasta olğanda nasıl çaparsıñ!
Çapmaq büyük baht! Ögge doğru atqan her bir adımıñ gipertoniya, gripp, revmatizm, infarktan uzaqlaştıra. Esken serin yelçik doğrudan-doğru seniñ cigerleriñe kelip tola. Qandamarlarıñda qan tıpqı çoqraq kibi qaynay.
 "Men qartal, ya da emen degilim. Lâkin olar qadar yaşarım. Men çapam, hastalıqlar menden qaça. Men çapam. Men… Men… Şu arada:
…Ey aqay, tur, aydı. Yeter yatqanıñ. Tez yuvun da qaveñni iç. İşke keç qalırsıñ, - dedi qadını.

… Olâ-an, saat doquz!.. Körgenim tüş eken daa. Mına endi çapmaqnı kör…

Yunus Qandım. 
Действия:

0 коммент.:

Yorum Gönder