2 Haziran 2015 Salı

Yunus Qandım: elyazma defterinden (VII)

Qırımtatar edebiyatı keñeşiniñ toplapşuvı oldu. 1997 senesindeki edebiy faaliyetke yekün çekildi. Şakir Selim yekün çekici maruzanen çıqışta bulundı. Toplaşuvnıñ birinci yarısında yoq edim. Arhivde edim. N.Çelebicihannıñ "Tatar hasta" degen mektübini arayım. "Millet"te bulamadım. Ne ise de... Toplaşuvda Cınğız Dağcınıñ üzerinde bulutlar kene qoyurmağa başlağanlar. Bunı toplaşuvnıñ protokolınen tanış olğanımda añladım.

Toplaşuvnıñ ekinci qısımı Daha meraqlı keçti. Üriye Edemova 1997 senesi çıqqan ve 1998-1999 seneleri çıqacaq kitaplarınıñ tematik ve redaktsion planları aqkında çıqış yaptı. Menim "Ümüt yipim" bu yıl da dünya yüzü körmeycek, ğaliba. Çıqmasa çıqmaz daa! Buña da darılmaq kerekmi? Yalıñız, bir istegim bar: planlarda belgilengen kitaplarnıñ episi dünya yüzü körsin! Yalıñız, milletniñ ruhiy vakuumı başqa şeylerge tolmasın. Episi kitaplar kendi oquycısını bulsın, vaqıt sınavından keçsinler. Edebiyatımız öleyatır, dep ateşi söngen, barotı qalmağan yazıcılarımıznı ruhnen öldürmek olmaz. Belki olarğa ruh bermek kerektir?!! Men yazıcılarımıznı acımayım. Olar iç kimseniñ acımasına muhtac degiller. Eñ müimi – olarnı VAQIT acımasın. Olar milletimizniñ variyeti – söngen olsalar da, boş olsalar da, atalıq yapmağa ıntılsalar da, olar dünniñ, bugünniñ yazıcıları.

 14.01.98.
Действия:

0 коммент.:

Yorum Gönder